الرئيسة تقارير وتحليلاتالجزء الثانى من تقارير عام 2016
 
الأربعاء 28 ديسمبر 2016

حمزة زوبع يكتب :الثلاثي الوقح (حوار تخيلي)
- آلو صباح الخير صديقي فخامة الرئيس عبدالفتاح..

- صباح الخير أخي معالي رئيس الوزراء كيف الحال؟

- والله أنا بخير وممنون كتير لجهودكم من أجل السلام، وعموم الشعب الإسرائيلي يقدر لكم مجهوداتكم لحماية دولة إسرائيل الديمقراطية من أعدائها في المنطقة..

- ولا أعداء ولا حاجة معالي رئيس الوزراء، نحن كلنا في قارب واحد ضد الإرهاب الإسلامي..

- لا أريد أن أقول إنه إرهاب إسلامي، ولكن أقول إنه إرهاب، لأن البعض يعتقد في البيت الأبيض أن الإرهاب لا دين له..

- لا، اسمح لي أن أختلف مع معاليك، أنا أعرف أنه إرهاب إسلامي وقد عاهدت الله أن أقوم بواجبي في القضاء على هذا الإرهاب الإسلامي عبر خطة التجديد الديني..

- أخشى على فخامتكم فالمنطقة ملتهبة والشعور الديني عظيم، ولكن أقول لك إن الرب معك وجميع حاخاماتنا يدعون لك ليل نهار وهم يطوفون ويصلون بالمسجد الأقصى الذي أتمنى أن تشرفنا بزيارته يوما ما.

- هاهاها، طبعا طبعا عن قريب ولكن بعد أن أنهي هذه المعركة مع الإرهاب الإسلامي..

- بالمناسبة عندي معلومة وعايز أتأكد من صحتها فخامة الرئيس و...

- (مقاطعا) أنا تحت أمرك معالي رئيس الوزراء، تفضل فخامتك..

- طيب بدون زعل، أنا علمت من مصادري أن بلدكم الصديق ينوي تقديم طلب إلى مجلس الأمن لإدانة موضوعات المستوطنات وهذا أمر كما تعرف لا يخدم عملية السلام، فكما تعلم أن إخوانك اليهود أصبحت أرض إسرائيل الحالية ضيقة عليهم ونحتاج إلى أراض أكثر، ونحن والله كما تعلم يا فخامة الرئيس نريد إعمارها من أجل السلام والمحبة التي جاءوا من أجلها إلينا و..

- هاها ها، وده كلام برضه معاليك؟ أنا فاهم إن فخامتك أذكى من كده بكتير وهتفهمها وهي طايرة خصوصا إن...

- (مقاطعا) والله وليس لك علي يمين أنا قلت في بالي كده إن فخامة الرئيس عبد الفتاح مش ممكن يفكر في حاجة تضر دولة وشعب إسرائيل الصديق، بس قعدت أقلبها في دماغي ومعرفتش هو غرض فخامتك إيه..

- يا سيدي بسيطة، أنت عارف وأنا عارف أن السنة الكبيسة دي هتخلص وعارف كمان أن الرئيس الأمريكي أوباما غير متعاون معانا في حاجة فقلت في نفسي، أعمل تحركا تكتيكيا على مستوى عال أكسب به نقطة في ملف القضية الفلسطينية، خصوصا أن موقفي مش ولا بد من ساعة هدم الأنفاق وإغراق غزة وحصارها، وانت عارف وأنا عارف أن أوباما مش طايقني وفاهم الملعوب فهو وبطريقة غشيمة سوف يستخدم الفيتو، وبكده نضرب ثلاثة عصافير بحجر واحد، ندين أوباما أمام العالم العربي والإسلامي في آخر أيامه، ونستعيد الملف الفلسطيني تاني بعدما قطر وتركيا بدأت تلعب بيه، وأسكت الشعب المصري وأقنعه أننا مع اخواتنا الفلسطيين وإن أوباما هو اللي ضد القضية. وأنا عارف طبعا إن التحرك ده مش هيؤثر على علاقاتنا أبدا بس دي مساحة مطلوبة خصوصا إني أنا مزنوق في الداخل ومحتاج أسترجع جزء من شعبيتي.

- يا إلهي، عظيم ومحنك طول عمرك، دعني أحيي ذكاء سعادتك وحنكتك السياسية، وكمان أحيي تفكيرك الاستراتيجي اللي ما شفتش زيه أبدا، بس عندي سؤال فخامة الرئيس: هو فخامتك متأكد جدا من الفيتو الأمريكي؟

- طبعا طبعا، أوباما هيعارض عشان هو متغاظ مني لأني شلت حبيبه الإسلامي من السلطة، أطمن معاليك.. أوباما غشيم وهيستخدم الفيتو، أنا عارفه..


بعد مرور ساعة زمن من المكاملة الأولى
- ألو صبحك الله بالخير فخامة الرئيس..

- صباح النور معالي رئيس الوزراء أخبارك ايه؟

- مش ولا بد فخامتك، مش ولا بد خالص. أخبار زفت. أخبار طين الحقني..

- لا تقلق أرجوك قل لي إيه اللي حصل، أنا لحد امبارح بالليل وأنا أتابع النشرات والدنيا فل وعال العال..

- لا مش عال أبدا فخامة الرئيس، عندي اخبار مش كويسة والزفت اللي اسمه أوباما مش هيستخدم الفيتو ضد القرار بتاع المستوطنات.

- لا مش معقول، باين عليه اتجنن، لا تؤاخذني يا معالي رئيس الوزراء، هو طول عمره منحاز لدولة إسرائيل، يعني اشمعنى المرة دي، وإزاي يعمل كده وفين رجالتكم في البيت الأبيض؟ وفين الرئيس المنتخب ترامب؟

- يا ابن الإيه، أنا كانت تايه عني فين حكاية ترامب، أسيبك شوية وأرجعلك، عفارم عليك عفارم عليك..

- ينفع كده برضه يا معالي رئيس الوزراء؟ بقى أنا أقول لك على الفكرة تقوم إنت تجري بيها وتكسب بنط طيب والله...

- لا ماتفهمنيش غلط أنا لا أستغني عن خدماتك، وجميلك محفوظ بس انا هاعمل اجتماع مصغرلمجلس الأمن وأناقش معاه الفكرة وأرجع لك، وإنت كمان تكون اجتمعت مع فريقك ونتكلم بعد شوية..

- اتكلم مع مين وفريق إيه؟ أنا رأيي من دماغي وباعمل اللي أنا عايزه. عموما ارجع لرجالتك واتصل بي بسرعة.

(بعد مرور ساعة)
- أهلا بفخامتك أتأخرت عليك بس سامحني الموضوع مهم جدا وخطير، واتفقنا إن أوباما النكد ده فعلا ناوي يطربقها على دولة اسرائيل وشعبها المسكين، عشان هيك والتزاما بدور فخامتك العظيم في تحريك عملية السلام، اتفقنا إن فخامتك تفاتح ترامب في الموضوع.

- آه بس أنا قلبتها في دماغي ولقيت إن أحسن طريقة أن ترامب يقنع أوباما يغير رأيه ويستخدم الفيتو ضد القرار اللي احنا مقدمينه عشان نحقق اهدافنا كلنا، أهدافنا ايه يا معالي رئيس الوزراء؟

- كلنا يا حبيبي كلنا، خلص عشان مفيش وقت هااااااا ، والقرار اللي اتخذناه إن مصر تسحب مشروعها من مجلس الأمن وتقول إن القرارات دي بتعطل التفاوض المباشر وليها تأثير سلبي على عملية السلام المستقبلية.

- آه بس أنا كده هتفضح والناس هتاكل وشي وبعدين في الآخر أنا هطلع بالشينة وهيقولوا في العالم العربي الخاين أهه..

- هاهاها يا فخامة الرئيس، الكلام كثير واولاد الحرام ما خلوش لأولاد الحلال حاجة..

- لا معاليك الموضوع جد وأنا لازم أطلع بحاجة ترفع راسي، وبعد إذنك اتصل بفريق ترامب وقل له إني عايز أتكلم معاه في الموضوع..

- هتطلع بعلاقة كويسة وترامب هيدعمك صدقني ده بيحبك قوي، واأا هارتب كل حاجة حاضر من عيوني..

(بعد مرور نصف ساعة)
- فخامة الرئيس عايز أقول لك إن الرئيس المنتخب في انتظار مكالمتك..

- تمام هاتصل به فورا بس مش عايز أي مقالب أنا عايز أكلم ترامب نفسه هاههااااههههااا

(بعد قليل)
- ألو فخامة الرئيس ترامب، معاك أخوك الصغير عبد الفتاح..

- أهلا بك يا عبد الفتاح، صديقنا نتنياهو قاللي إنك معترض على سحب مشروع القرار، هو احنا هنلعب وإلا إيه، إنت عارف أن المعونات اللي بنقدمها لكم وتحديدا للجيش هدفها حماية أمن وسلامة اسرائيل، تقوم انت تقدم مشروع قرار يدين إسرائيل بدون ما ترجع لي؟ الفوضى بتاعة زمان انتهت، هاسيبك دلوقتي وعايز أسمع من الإعلام أخبار كويسة..

- يا فخامة الرئيس موقفي صعب طيب أقول للشعب وللعرب ايه؟

- عرب ايه وشعب ايه، قل لهم إن انت اتفقت معايا على سحب المشروع عشان نعطي فرصة للإدارة الجديدة تخلص القضية..

- طيب فخامتك اديني وقت..

- مفيش وقت عايز أسمع إنك سحبت القرار، وبعدين عايز وقت ليه، إنت قرارك من دماغك..

- طيب..

-انقطع الاتصال.

(بعد قليل)
مصر تعلن عن سحبها لمشروع إدانة المستوطنات الإسرايئلية على كامل الأراضي الفلسطينية. تتحرك الإدارة الأمريكية للانتقام من تدخل ترامب الغبي قبل حلفه اليمين، ولتضع حدا لتحركات السيسي الأكروباتية ولتصفع نتنياهو على قفاه قبل نهاية السنة.

عبد الفتاح السيسي يضرب أخماس في أسداس ويقرر أن يخرج من المأزق بافتتاح مصنع بتروكيماويات مفتوح بقاله ييجي ربع قرن.

(سنة حلوة يا جميل، وهابي كريسماس لعبد الفتاح).

 
 
   Bookmark and Share      
  
 الثلاثي الوقح (حوار تخيلي)

dyn-web.com

أفضل مشاهدة بدقة 768 *1024 أو أعلى باستخدام فاير فوكس أو انترنت اكسبلورر 7